Gwybodaeth cefndirol ar y ddwy gymuned, gyda chysylltiadau i safleoedd lleol eraill

 

Hanes gwreiddiau'r gefeillio

 

Crynodeb o'r ymweliadau

 

Ymweliadau wnaed gan grwpiau chwaraeon a chymunedol

 

Arwyddion gweladwy o'r gefeillio

Croeso i'r wefan sy'n dathlu gefeillio ein dwy dref - Brieg yn LLydaw a Rhuthun yng Nghymru.

 

Yma cewch lawer o wybodaeth ynglyn a'r ddwy dref, sut y cychwynnodd y gefeillio, a sut mae'r ymweliadau lu wedi mynd rhagddynt ym mhob cyfeiriad. A chan ein bod eisiau i fwy o bobl ymuno a mwynhau bendithion gefeillio, gallwch weld sut i gymryd rhan!

 

I'r rhai ohonoch sydd wedi mwynhau eisoes gwmni ein gwesteion neu westywyr, rydym yn wastad yn falch o dderbyn unrhyw ffotograffau neu nodiadau y gallem eu hychwanegu i'r safle.

 

 

Penblwydd mawr y Gefeillio

 

 

Eleni bydd Cymdeithas Efeillio Rhuthun yn dathlu 25 mlynedd ers cychwyn y gefeillio gyda Brieg yn Llydaw. Anodd credu bod cymaint o amser wedi treulio ers inni arwyddo’r siarter efeillio mewn pedair iaith yng Nghastell Rhuthun a Neuadd y Dref, Brieg. Ar y 10fed penblwydd newidiodd Brieg un o’u sgwariau yn Plasenn Rhuthun

(Sgwâr Rhuthun) ac fe blanwyd coed poplys du o Lysfasi ym Mrieg a phob pentref. Ar y 15fed penblwydd enwyd Cylchfan Briec. Dros y blynyddoedd cyfnewidwyd anrhegion eraill agellir gweld rhai ohonynt yn Llyfrgell Rhuthun lle y cynhelir arddangosfa ym mis Mehefin.

 

Yn dilyn arwyddo’r siarter efeillio ffurfiwyd Cymdeithas Efeillio Rhuthun a’r Cylch gyda phwyllgor gweithredol a Maer Rhuthun yn Llywydd. Mae ardal y Gymdeithas Efeillio yn cynnwys cymunedau Rhuthun, Efenechtyd, Llanfair a Llanynys. Mae ardal Cymdeithas Efeillio Brieg yn cynnwys cymunedau Brieg, Edern, Landrevarzec, Landudal a Langolen (sylwch ar yr enwau cyfarwydd!)

 

Ers 1993 mae’r pwyllgor gweithredol wedi cyfarfod yn rheolaidd i drefnu ymweliadau i ac o Brieg, gyda digwyddiadau codi arian yn cael eu trefnu i gyfarfod a’r gost o dderbyn ein ffrindiau o Lydaw bob dwy flynedd. Yn y blynyddoedd rhyngddynt rydym wedi derbyn croeso arbennig gan ein ffrindiau yn Brieg. Hanfod gefeillio yw bod pobl yn aros gyda phobl yn eu cartrefi, ac nid mewn gwestai. Datblygodd llawer o gyfeillgarwch personol dros y blynyddoedd.

 

Cymdeithas Efeillio Rhuthun drefnodd yr Wyl Rhuthun gyntaf yn 1994 ac ers hynny cymerodd Pwyllgor yr Wyl drosodd a threfnu gwyl flynyddol ers 1996.

 

Yn ogystal ac ymweliadau trigolion Rhuthun a’r cylch bob dwy flynedd mae llawer o fudiadau wedi gwneud y siwrne o Ruthun i Brieg ac o Brieg i Ruthun. Ymwelodd Cor Rhuthun a Brieg ddwywaith gan chwarae i neuaddau llawn yn Neuadd Gyngerdd Artemuse yn Brieg; Eglwys Sant Pedr, Brieg; Eglwys Gadeiriol Kemper ac Eglwys Pleyben. Mae’r mudiadau eraill sydd wedi ymweld a Brieg yn cynnwys ffermwyr, Ruthin Majorettes a Thim Peldroed Iau Rhuthun. Yn eu tro mae Bagad Brieg a Dawnswyr Gwen ha Du Landrevarzec wedi cymeryd rhan mewn sawl Gwyl Rhuthun.

 

Mae Cymdeithas Efeillio Rhuthun yn agored i bawb. Ar wahan i gyfraniad blynyddol gan Gyngor Tref Rhuthun mae’n codi arian i groesawu ein ffrindiau o Brieg drwy daliadau aelodaeth, Clwb 100, boreau coffi, nosweithiau caws a gwin, swperau safari, cwisiau ac ati. Pan fyddwn yn ymweld a Brieg bob dwy flynedd mae pawb yn talu eu costau teithio ond wedi cyrraedd derbyniwn lety, bwyd a rhaglen o ddigwyddiadau.

 

I ddathlu’r penblwydd arbennig hwn bydd parti o 40 gan gynnwys 20 o’r grwp offerynol Bagad Brieg yn dod trosodd o Brieg ar 29 Mehefin gan aros yma yn Rhuthun am dair noson a dychwelyd ar yr 2 Gorffennaf. Ar y Dydd Sadwrn bydd y Bagad yn gorymdeithio o Neuadd y Dref i Sgwar Sant Pedr lle byddant yn  chwarae yn Top Dre Gwyl Rhuthun. Golyga hyn y byddwn yn chwilio am tua 25 o deuluoedd i gynnig gwely a brecwast, un cinio ac un pryd min nos iddynt. Darperir y prydau eraill gan y Gymdeithas.

 

Mae grwp Rhuthun yn cyfarfod ar yr ail nos Iau ymhob mis fel arfer (ar wahan i fis Awst) yn Tabernacl, 7.30 p.m.

 

Croeso i aelodau newydd

 

Ymaelodi cysylltwch gyda Menna Jones, Swyddog Aelodaeth,

7 Tanycastell, Rhuthun (Tel: 01824 704350 e-bost [email protected]

 

 

Siarad Ffrangeg?  Dysgu Ffrangeg?

Nid oes angen Ffraneg rhugl.

Nid oes angen Ffraneg o gwbl!!!

 

Mae'r rhain yn ddigwyddiadau cymdeithasol gwych, felly rhowch gynnig arno!!!!!

 

Alors, allez - y!

 

 

 

 

 

Gwybodaeth bellach:  01824 704558  

Ysgrifennydd: [email protected]